Share on FacebookShare on TwitterShare on WhatsappCopy LinkLink is Copied!
Share this page
Newid hinsawdd, Isadeiledd Gwyrdd a Rheoli Llifogydd Naturiol.
Mae newid hinsawdd yn effeithio arnom ni i gyd ac mae ei effeithiau’n dod yn fwy gweladwy o’n cwmpas o ddydd i ddydd. Ochr yn ochr â’r digwyddiadau tywydd eithafol sy’n achosi mwy o lifogydd, sychder, tonnau gwres a thanau gwyllt, mae newidiadau cynnil yn digwydd ar draws Tirwedd Genedlaethol Bryniau Clwyd a Dyffryn Dyfrdwy sy’n peri bygythiadau i rinweddau arbennig y dirwedd a ddiogelir hon.
Mae’r gofodau gwyrdd, coed trefol ac afonydd, nentydd a llynnoedd yn ffurfio rhwydwaith gyfoethog o ‘Isadeiledd Gwyrdd’ o amgylch y Dirwedd Genedlaethol. Trwy ddiogelu, adfer ac ychwanegu at y rhwydwaith hwn, gallwn gefnogi bioamrywiaeth, iechyd a lles cymunedau lleol a helpu i arafu llif dyfroedd llifogydd gan leihau effaith digwyddiadau llifogydd mawr.
Mae llifogydd yn effeithio ar sawl preswylydd, busnes ac ymwelydd y Dirwedd Genedlaethol ac mae’n cael effaith drychinebus ar nifer o’n cynefinoedd pwysig. Gall ymagweddau rheoli llifogydd naturiol (NFM) gynorthwyo i leihau effaith digwyddiadau llifogydd wrth greu cynefinoedd newydd, gwella ansawdd dŵr a helpu i fynd i’r afael â’r argyfwng ecolegol. Yn aml mae’r ymagweddau rheoli llifogydd naturiol hyn yn cynnwys dulliau syml o arafu dyfroedd er mwyn bod o fudd i’r dirwedd y mae’n teithio drwyddi (drwy hydradu da byw, cnydau a phlanhigion) wrth leihau effaith negyddol gormod o ddŵr ymhellach i lawr yr afonydd.
Yn adran prosiectau’r wefan gallwch ddysgu mwy am y gwaith yr ydym yn ei wneud i fynd i’r afael â’r argyfyngau hinsawdd ac ecolegol, i wella ein Hisadeiledd Gwyrdd ac i leihau effaith llifogydd drwy brosiectau Rheoli Llifogydd Naturiol ar draws y Dirwedd Genedlaethol.
Mae newid hinsawdd yn peri bygythiadau amrywiol i’n Hardal o Harddwch Naturiol Eithriadol, rhai y gallwn baratoi ar eu cyfer a’u lliniaru. Mae’r ddogfen hon yn archwilio’r Dirwedd Genedlaethol yn ôl math o dirwedd gan nodi’r prif flaenoriaethau a’r heriau y mae pob tirwedd yn eu hwynebu cyn mynd ymlaen i nodi sut all yr hinsawdd sy’n newid effeithio ar y dirwedd, pa fesurau lliniaru y gallwn eu cymryd ac yna canolbwyntio ar y risgiau allweddol a’r addasiadau y gallwn eu gwneud i leihau effaith a difrifoldeb newid hinsawdd. Mae hon yn ddogfen ar gyfer rheolwyr tir, grwpiau cymunedol, y rhai sy’n creu polisïau ac unrhyw un sydd â diddordeb yn nhirweddau Bryniau Clwyd a Dyffryn Dyfrdwy.
